肯亞徐教練 蘇凱男解說NIKE+ Run Club

運動

廣告

上一期,筆者帶大家到訪北京,預覽NIKE秋冬新品預覽之外,更加率先體驗NIKE+ Run Club(NRC)喺大中華區嘅全面升級,跟大中華區嘅教練同配速員進行各種訓練及享受各種服務,時至今日,NRC嘅發展可以話非常全面同成熟。但其實回顧番最初,NRC到底係點樣由1塊晶片,演進到而家嘅全新跑步生態體系?NIKE Master Coach蘇凱男可以話係陪伴住香港NRC一齊成長,今回由佢為大家拆解NRC就最適合不過。

text – Lok(ig:loklokb1021) photo –Billy

獨立跑步生態體系

NIKE+ Run Club(NRC)係個由NIKE+社區延展出嚟,融入以NIKE店鋪為基地嘅跑步團體、服務體驗,加上於2013年喺大中華區推出嘅NIKE+ Run Club微信服務號,從而打造1個面向所有跑者嘅會員制跑步生態體系。每位跑步愛好者只要註冊成為NIKE+會員就可以加入NRC,跑者可以根據自身實際情況於網上預約適合自己嘅跑步課程,參加由NRC教練及配速員帶領嘅訓練,課程由NRC全球教練設計,以滿足各個唔同水平跑者嘅全面需求。


內容延讀:

香港MVP陳德恩 打出名堂8件事

【跑友必睇】NIKE RUN CLUB 大中華全面升級

跑步唔再係一個人嘅事

近期跑步熱潮令好多人加入跑步行列,同時認識到NRC,但其實最初香港嘅NRC並唔係咁,蘇sir見證呢幾年入面嘅種種改變。到底佢係點樣開始?而家係咩心態?將來又想帶嚟咩影響?

N:《新Monday》 S:蘇凱男

N: 講下NRC嘅演變?

S: 「一開始就只係鞋底上嘅1塊晶片,當時App都未有,喺1個網上platform,將你嘅跑步data過去網頁,之後開始有《NIKE+ Running》App,可以用手電同步,而香港就係3年前開始有NRC呢個同跑手接觸嘅Run Club。」

N: 香港NRC一開始係點?

S: 「當時好簡單,每星期1次跑步活動,內容亦都未有太多訓練,到後來慢慢開始多人參加,就有pacer(配速員)去帶跑,照顧大家,再到而家發展到會提供唔同水平嘅訓練。就算你係個資深跑手,就算你已經跑得好快,亦都會有相對嘅訓練。」

N: NRC喺跑步文化嘅推動上係個點嘅角色?

S: 「香港跑步風氣喺近10年先開始盛行,愈嚟愈多人跑步,參加唔同賽事,但以前跑步都係比較傳統式嘅訓練,可能去衝跑,去不斷突破成績,感覺上跑步係好刻苦,要捱。NRC嘅出現就令大家用另1個角色去認識跑步,成績係重要,但跑得開心同樣重要,大家一齊努力,形成1個社交圈子,呢個就係NRC帶嚟嘅改變。」

N: 呢幾年間,本地跑手嘅水平有冇提升?

S: 「有,3年前我哋開始咗個叫UMT嘅programme,係個歷時3個月嘅賽前訓練,好多初學或中階嘅跑手就算完成programme後,都會繼續自己訓練,上咗癮,甚至自己組織跑步活動。到今時今日搵到方法令自己進步,我哋做嘅就係提供1個啱佢哋口味而又可以令佢哋進步嘅平台。」

N: 你認為social network同跑步之間嘅關係係點?

S: 「以往跑步係件個人嘅事,或者要去到好高水平贏到比賽,有人訪問先會有人知道我跑出一啲成就,對於初學者、唔快嘅跑手嚟講,即使你每次跑步都做到自己嘅成就、目標,都唔會有人知。Social network嘅出現就係可以分享成果,大家食飯都可以傾下對方跑成點,令跑步呢件事好正面,互相鼓勵。跑步世界入面,每個人都可以進步,係可以一齊共贏,social network喺呢個角度係作出咗好大嘅推動。當然重有比賽資訊、訓練知識等好容易傳遞到俾朋友,令跑步唔再係1個人嘅事。」

N: 作為NRC教練,你有冇咩使命想做到?

S: 「我好想透過我哋Run Club去提升香港跑步各樣嘢嘅水平,例如技術上,點樣教到跑手步姿好、訓練內容好、點進步、點調整等等;心態上,點樣引導自己不斷突破。我親身見過好多以前好叻嘅跑手,去到某個樽頸位迷失咗,覺得跑步冇咗意義而放棄。我哋就係想令大家保持正面,又搵到水平相若嘅朋友一齊尋求突破,有指定教練亦無須需學費,呢個就係我想透過NRC做到嘅目標。」


內容延讀:

香港MVP陳德恩 打出名堂8件事

【跑友必睇】NIKE RUN CLUB 大中華全面升級

There are 2 comments

Add yours

Comments are closed.