百米飛人蘇炳添 登港實測NRC

運動

廣告

細個我哋要形容趕住去做1件事,或者形容好快完成1件事,我哋會話「9秒9去乜乜乜」、「9秒9搞掂」,因為「9秒9」係個看似不可能嘅時間,但對於中國百米飛人蘇炳添嚟講就唔同講法,今年佢先喺美國國際田聯鑽石聯賽跑出9秒99,成為歷史上首位突破10秒大關嘅黃種人,再喺北京世界田徑錦標賽男子百米準決賽,以9秒99成績闖入決賽,成為首個亞洲人喺世界大賽進入男子百米決賽賽場。冇錯,「9秒9」只係個等待佢去突破嘅數字。 早排飛人嚟到香港,我哋當然9秒9搵佢做訪問,重有幸同佢一齊體驗NRC(NIKE+ Run Club),順便睇埋FAHO15 Collection,即刻9秒9睇晒佢!

text – Lok(ig:loklokb1021) photo – Kei

我唔係田徑壇巨星 我係蘇炳添

蘇炳添,首位突破10秒大關嘅黃種人,實力無庸置疑,而佢自己亦充滿自信,不過唔係串嗰隻,係非常正面嘅運動員應有態度。到底佢又點睇屬於自己嘅跑道?

N:《新Monday》 S:蘇炳添

N:點樣開始跑步?

S: 「初三時被老師發掘出嚟跑步,起初訓練時一定覺得辛苦,到後來跑到少少成績,發覺自己對跑步都幾有天分,就開始愈嚟愈鍾意跑步。跑步係我嘅事業,亦因為咁我會不斷研究自己跑步嘅方向,尋求1種突破自己嘅新方法。」

N: 短短3個月內嘅比賽跑出兩次9秒99成績,心情有冇咩分別呢?

S: 「有㗎!第1次破10秒感覺當然好興奮,同時肯定咗我今年開始改變訓練模式嘅決定係啱。第2次世錦賽嘅成績,說服力會大啲,因為第1次係喺順風情況下跑,好多人會話係喺跑道嘅幫助下先做到,到今次北京世錦賽喺『鳥巢』舉行,當日我係喺逆風之下跑出9秒99,成功證明自己。」

N:而家你同亞洲紀錄爭幾多?有冇信心突破?

S: 「亞洲100米紀錄係9秒91,其實同9秒99只差一瞬間,但畢竟要進步多0.01秒都係件難事,靠嘅係比賽時嘅臨場爆發力,呢啲喺訓練入面都未必有嘅內容,只有靠比賽同對手嚟提升自己。」

N: 你話自己改變咗訓練內容,實際上有咩改變?

S: 「就好似重新學習短跑咁,因為以前嘅跑法已經達到1個頂峰,已經有兩年都冇咩進步,所以我就大膽改變學習另1個方法,由於起跑嘅第1步係會影響之後嘅節奏,所以我由以前跑47步完成100米改到48步,喺節奏方面有好大變化,結果證明係成功。」

N: 知道你參加過NRC,覺得如何?

S: 「我覺得氣氛好好,大家互相鼓勵、互相支持,雖然我自己比賽跑100米,但其實我都鍾意跑長少少嘅距離,好似4、5K咁,有同伴一齊跑會令自己更有動力跑落去。」

N: 劉翔之後,有冇諗過自己可以成為下個中國田徑壇巨星?

S: 「冇諗過,冇諗過自己會唔會成為下個劉翔,冇諗過自己會唔會成為田徑壇巨星,我只係希望將來人哋講起跑100米,會記得我蘇炳添。」

實測NRC 百米飛人都讚好

訪問百米飛人已經難得,可以同飛人一齊跑步就更加難得! 訪問完之後,我哋有機會同蘇炳添去體驗香港嘅NRC訓練,重搵嚟NIKE master coach蘇凱男帶領。升級後嘅NRC我哋都介紹過唔少次,首先佢會按照唔同跑者嘅個人能力,分發唔同顏色手帶,令每個程度嘅跑手都可以得到適當嘅訓練,由蘇sir帶領熱身後,我哋就開始當日訓練項目:疾速跑(Speed Run)及鍛煉跑(H.I.T & Run),首先搵到合適嘅配速,分段衝刺全面提高耐力、速度、平衡同身體靈活性,提高跑者速度極限。當然,蘇炳添力都未出就已經足以拋離我哋,但就如佢所講,一大班人一齊訓練,的確冇咁易放棄,完咗之後,重會send番相去你登記嘅e-mail!連飛人都話正!

NIKE FAHO15 跑過北極光

所謂一不離二,二不離三,訪問完蘇炳添,跑完步已經好正,點知同場重有得睇埋NIKE秋冬季新品預覽!真係一次過滿足哂3個願望。今季繼續大玩秋冬最重要嘅反光元素,因為反光元素可以發揮保護跑者嘅功效,當中以跑步系列NIKE Flash Pack最為吸睛,而有別於千篇一律嘅反光條,今年全新升級嘅Flash Pack以「黑夜中的閃耀極光」為靈感,大膽推出彩色花紋反光設計,除咗使用800蓬羽絨保暖區域及熱壓鐳射打孔設計嘅新款Aeroloft Flash羽絨背心外,連同系列跑鞋亦具有「北極光」效果,絕對震撼。當然唔少得每季都搶購一空嘅NIKE Sportswear,招牌Tech Fleece撞上迷彩效果更加出色,有買趁手。