學完2PM 玉澤演 點做CEO再去拎 OKCAT 禮品
CEO唔易做
OKCAT 喺韓國推出2年多，一直以網上商店及不定期Pop-up Store形式售賣商品，上星期， OKCAT 首次出國，喺wtc more世貿中心舉行展覽，身為CEO嘅 玉澤演 就算喺韓國趕拍新劇，都親身飛嚟香港支持兼接受訪問，諗住問呢位年輕有為CEO嘅創業心得，結果……
「（一輪傻笑後）其實品牌開始咗1年左右，自己唔係有太多心得，不過最重要識得喺理想同現實中取得平衡，我想用 OKCAT 去做好多嘢，但都要考慮喺現實中有咩係做到，而且運作1間公司始終都係要搵錢為主，所以銷售同成本都要清楚計算，呢啲可能就係創業要留意嘅地方。成立品牌時，真係冇咩困難嘅地方，加上自己大學時係讀經營學，所以……算係學以致用，哈！」事實上，以2PM出道多年嘅人氣同粉絲，呢門生意又真係唔憂做。玉澤演話其實一開始時想將 OKCAT 漫畫化，不過現實與理想永遠難以共存，所以而家惟有努力搵更多錢，希望有朝可以成事。
有錢唔會齊齊搵
講到 OKCAT 由來， 玉澤演 只係記得由細個開始已經畫貓，但最奇係當時屋企冇養任何寵物，不過，佢話點奇都係自己成為CEO。既要唱歌拍劇拍綜藝，重要抽時間去打理生意，會否覺得1日24小時唔夠用呢？玉澤演笑笑口話其實自己只係負責做最後確認，其他嘢全部由同事負責，夠坦白。
「可以將從小開始畫嘅畫變成卡通角色，而且能夠去到海外宣傳，真係好神奇有趣。其實而家 OKCAT 嘅嘢都已經交晒俾同事處理，我自己都係做樣本最後確認同修改，所以唔會影響其他工作，哈哈！（本身畫畫有天分？）我原本一開始畫嘅手稿入面， OKCAT 其實係隻醜樣但有魅力嘅貓，不過而家開始變靚，而且佢嘅產品有其他工作人員幫我用電腦去修改得更好睇，哈哈！」生意愈做愈大，有冇諗過邀請隊友入股？「隊友對佢好似完全唔關心，我覺得佢哋唔會做囉！（咁社長JYP呢?）嗯……唔會想佢入股，因為細個已經學識唔會同其他人一齊做生意！哈哈。」
現送出「wtc more x OKCAT K-POP Music Jam」限定卡片套以及旅行証件套。想要嘅朋友，請留意遊戲玩法，即有機會獲得。
・於網站comment/留言位置分享你最想推出嘅 OKCAT 產品。
・填妥表格及遞交。
・《新Monday》將會揀出心水答案。
・得獎名單將會喺網站公布，得獎者將獲電郵通知。
遊戲截止日期︰29/07（11:00pm），得獎者將獲電郵通知。
《新Monday》保留最終決議權
內容延讀
>【放毒時間】具荷拉半裸噴血相(11P)
>【一齊WOW】 少女時代噴血寫真
