樂視播英超 3件球迷想佢做到嘅事
廣告
當尋日樂視宣布拎咗3屆英超轉播權嗰陣，小編無咩意外，畢竟傳咗成個月話樂視天價買英超。不過最搞笑係nowTV突然出聲明話同樂視合作繼續播英超，但人哋轉個頭話無呢回事，真係唔知信邊個好！點都好，球迷想睇波，錢都要照科。作為1個忠實英超迷，每個月俾少少錢睇唔係問題，不過要心甘情願俾錢，你都要滿足到球迷嘅要求。既然樂視第1次播英超，就等一班睇開波嘅NM同事話俾佢哋聽，喺香港播足球到底有咩嘢要做到先合格？
text – ming
1. 「要搵返啲好似何輝咁Pro嘅講波佬先好喎！」
「講波佬」係好影響到球迷對場波嘅觀感。有線以前有「紅魔堅」同「利榮基」呢啲幫自己愛隊幫到出晒面嘅評述員；nowTV唔使講最難頂梗係連球員名都未講得清楚嘅大哥瑜…所以就算樂視有4K睇波乜乜乜，點都要搵返個有料嘅評述員先work！
2. 「英超一年有380場波，邊可能睇得晒？」
1年380場波，就算坐定定睇，同一時間只係睇到1場，1個月俾幾舊水可能只係睇到4-5場波。其實喺其他地方已經有出現類似球迷package嘅收費方法，例如你鍾意阿仙奴，你就可以全季淨係俾錢睇阿仙奴啲賽事，甚至可以逐場俾錢睇。前幾日樂視講就話佢哋嘅收費方式會好有「彈性」…
3. 「除咗球迷，希望連香港年青球員都可以受惠。」
樂視連發布會都可以搵到舒米高嚟同班後生仔玩下波，我估佢哋可以同英超嗰邊夾好多嘢啩！例如同球會合作，每年送香港年青球員去嗰邊受訓；或者邀請佢哋啲U18/U21嚟香港踢friendly；再唔係送啲教練去英國學人地教波個套方法，總之唔好淨係買波返嚟播，然後搵啲廣東話評述員就當正自己已經好本土！
講咗咁耐，其實樂視播英超要等到下年8月，連月費幾多都未知，所以好多嘢都只不過係FF。不過聽講話依家join樂視個$0狂睇plan會免16-17英超首月月費！計落好似無蝕底，可以諗諗。
內容延讀﹕
＞你敢唔敢挑機？5張係人睇完都想講粗口嘅圖
＞下半年10對唔買會自責嘅AIR JORDAN 30週年勁鞋
