想要威 唔使戴頭盔 極速三輪車

飲食

廣告

電單車,絕對係追求刺激男士其中1種至愛嗜好,皆因速度感同離心力係4個轆冇得比。但2個轆始終「皮包鐵」,細膽如筆者真係唔敢做鐵騎士。

呢期香港車界興起1種機動三輪車(Trike),外形係越野四驅車同電單車嘅混合體,佢勁有速度感,但比起2個轆穩陣,而且只需要電單車牌就揸得,所以深受車界人士歡迎。

我哋搵嚟3位三輪車車主及1位本地三輪車車廠負責人分享玩車須知同樂趣,佢哋講笑咁話,玩呢種車夠晒威,重唔使戴頭盔!

text-Oscar photo-Sun design-YUI

唔使戴頭盔?

一般市民未必清楚,機動三輪車同電單車嘅分別,就連法律上定義「三輪車」都出現過唔少爭拗,我哋搵嚟律師梁永鏗羅列以下幾點,等你更了解有關機動三輪車嘅香港法律條文:

• 一般持有「電單車駕駛執照」(即俗稱嘅3號牌)人士,已經同時持有「機動三輪車駕駛執照」(即22號牌)。

• 不過就算你擁有以上車牌,亦唔可以去長洲或南丫島揸島上獨有嘅三輪貨車,因為根據「道路交通條例」,「機動三輪車」係唔包括有拖車嘅電單車同鄉村車輛(即愉景灣見到嘅高球車)。

• 前面或後面平衡嘅左右2個輪胎,相距不少於460毫米,先可以稱為「三輪車」。

• 泊車方面,根據「道路交通泊車條例」,機動三輪車唔准泊電單車車位,但由於佢亦唔符合「私家車」定義(即最多乘載8人嘅的士、電單車、機動三輪車等以外嘅私人用車輛),所以佢都唔可以停泊公共私家車車位。換句話講,泊街邊咪錶車位有機會被抄牌,所以建議泊喺私人停車場。

• 根據運輸署指引,「佩戴頭盔」守則未包括三輪車司機同乘客,所以駕駛三輪車可無須佩戴頭盔。不過,Jason同Aaron都異口同聲話,如果發生意外,始終身體都係首先受到撞擊,頭盔、手套等都係保護自己嘅最佳工具。
內容延讀:

E3速報!10隻玩硬勁games 睇完即想買主機

新《龍珠 超》預告片 最新強敵竟然係佢哋?

【假日拍拖新節目!】放飛機放Q版 囡囡都愛玩

似玩高卡車

Jason話,機動三輪車約7年前喺北美地區開始流行,當地人主要用於旅行同露營代步,當地人好興喺車身側加乘客側車,車尾又會加個行李拖車。「香港係近呢兩年先叫做hit,不過香港法例就唔容許加側車或拖車,想載人就只可以坐後座。」

單睇外形,機動三輪車係架「多1個轆」嘅電單車,亦只要有電單車駕駛執照就可揸出街。但有50年電單車駕駛經驗嘅Aaron就話,喺駕使手感同技法上,兩者有好大分別:「唔可以用電單車技術套入機動三輪車,我覺得三輪車感覺反而似揸高卡車(go kart)。平衡方面亦好過電單車好多,例如入彎唔需要好似電單車咁以身體做平衡;停車時,駕駛者無須以腳撐地保持平衡,車身都能夠企得穩,呢樣亦係三輪車愈嚟愈普及嘅原因。」

另1位車主Jimmy補充:「揸住架三輪車,其他司機見到我哋打燈cut線,都會主動收油俾我哋行先,心理感覺上着數咗。最緊要係唔使戴頭盔,free好多!」

最高時速200km/h

香港嘅三輪車以進口為主,就好似3位被訪者都係揸加拿大車廠BRP嘅Can-am Spyder,話因為佢外形sharp醒,重配備990cc Rotax引擎,時速最高可達200km/h,同時亦有「前4後1」波箱,加埋腳break,揸出街真係爽死。不過最基本售價要成$238,000,絕對係一分錢一分貨。

對於新手嚟講,如果有人教下自己點控制架三輪車,會揸得更安心同放心,坊間有啲車行會做埋車主聯誼聚會,傾下車經食下嘢。Jason話,唔少三輪車車主包括佢都會喺星期六日揸住架三輪車四圍去,不過因「警察唔鍾意一大群車揸出街」,所以每次聚會都係5、6人左右。如果有興趣同其他車主交流心得,就可以聯絡車行再作安排。

邊度有得買?

文偉電單車中心

筲箕灣南安街93號地下B鋪 2567 5707

平價玩 本土三輪車

三輪車喺香港愈來愈多人玩,除咗因為外形靚仔,價錢原來亦可以好大眾化。就以Hong Kong Trike呢個由香港人投資及設計嘅三輪車品牌咁,佢哋可因應買家要求tailor-made,價錢重只係約7萬蚊,超抵玩!

負責人Roland話,第1代嘅三輪車外形似沙灘四驅車,令唔少買家都好疑惑「究竟可唔可以揸出街」。於是佢哋因應客人要求,將三輪車車身重新設計,亦可因應客人喜好,無論顏色、配件,甚至引擎等都可一一度身訂造,接過訂單後,約3星期就有新車到港。

Roland話:「我哋希望將三輪車可以喺香港更普及,分析過之後,發現好多人都因價錢太貴而唔捨得做車主。於是由降低成本入手,減少不必要花巧嘢,令售價比其他出口車平至少1倍,希望可以吸引更多人玩。」不過Roland補充話,由於三輪車要泊私家車車位,反而呢樣最「重本」!

邊度有得買

Hong Kong Trike

葵涌工業街10-14號革發工業大廈前座305A室 http://www.trike.com.hk

 
內容延讀:

E3速報!10隻玩硬勁games 睇完即想買主機

新《龍珠 超》預告片 最新強敵竟然係佢哋?

【假日拍拖新節目!】放飛機放Q版 囡囡都愛玩

5大型爆三輪車

機動三輪車雖然一度被電單車忠粉話太「乸形」、「咁驚就揸番4個轆啦」,但隨住時代轉變,現已經成為潮流,重有唔少人幫愛驅改頭換面。我哋搵嚟5架型爆三輪車,等你都恨下做車主。

關鍵詞
biketrike

There is 1 comment

Add yours

Comments are closed.