重溫必讀!《他來自江湖》懶人包

電視

廣告

雖然神劇《大時代》播完,不過大家唔使失落,因為今晚有另1套神劇《他來自江湖》接力。正所謂「想要笑爆嘴,必搵何金水。」《他》劇絕對係星爺喺電視圈嘅巔峰之作﹕笑料之密、質素之高都可謂震古鑠今,睇30集嘅《他》劇,根本就等於睇咗30套星爺嘅電影一樣!

乜話?你已經唔記得晒?(還是你未睇過?)唔緊要,我哋精選咗劇裏面必睇細節位、金句同背後趣聞做咗個懶人包,溫習一次之後先再欣賞《他》劇,必定倍添樂趣!

text-專題組

1. 何金水其實唔係何「金水」

呢樣嘢當年係《他劇》嘅熱話之一,因為戲裏面所有角色都叫佢做「金水」,實則佢個名正寫何「鑫淼」,應該讀「音秒」至啱。

2. 金水偶像夏金城

《他》劇最初頭半部,金水係個的士司機,佢最愛揸車時唱嘅歌《為了靚靚》同《馬小靈》,係歌手夏金城嘅作品。呢位夏金城極為傳奇,佢本來有十幾架的士喺手,為咗自資出錄音帶同CD就將所有的士賣晒!星爺喺《他》劇成日唱夏氏嘅歌,直接令夏氏嘅錄音帶鎖量暴升,據聞當時賣出超過50萬盒!

夏金城

內容延讀﹕

再睇懷舊嘢!恐龍屋率先現身﹗荔園 50遊戲景點足本曝光

新《龍珠 超》預告片 最新強敵竟然係佢哋?

3.契咗吳孟達做契仔

星爺日後同達哥吳孟達用嚟橫掃香港喜劇電影市場嘅搞笑招數,幾乎全部都可以喺《他》劇搵到﹕好似劇中飾演星爺老竇嘅達哥,每逢有《將軍令》音樂,都會耍起何家太極拳。呢條橋段日後喺《賭聖》同《整蠱專家》都有用,達哥一聽到「三叔」同「阿爸」呢兩句magic word都會發晒癲,不過最癲都係現實中,星爺契咗達哥做契仔,貫徹無厘頭作風。

4.導演編劇客串

戲中作為編導嘅李力持不時出鏡,乘客甲,食客乙….而已故武俠劇大師蕭笙亦有份客串,戲裏面佢都係做返導演。

5.超多金句

秉承前作《蓋世豪俠》,星爺喺《他來自江湖》金句極多,除咗佢成日哼夏金城名曲《為了靚靚》同《馬小靈》之外,重有金句如下﹕「呢鋪真係代表作囉!」(整蠱的士乘客成功後)、「坐低飲杯茶食個包啦~」、「你講嘢呀?」(《蓋世豪俠》金句延續)、「恭喜!恭喜!你老竇有身己己己己!」(同達哥吹水時)、「先生幾多位?Mark開邊條仔?」(招呼客人時)、「搵人唔好搵外表,拍拖至好搵隻蕉!」…等等,實在不能盡錄!

 

內容延讀﹕

再睇懷舊嘢!恐龍屋率先現身﹗荔園 50遊戲景點足本曝光

新《龍珠 超》預告片 最新強敵竟然係佢哋?

6.金水口快迫娶甩頭枝

筆者認為全套戲最爆笑地方,係大結局尾段,金水同梅小惠飾演嘅甩頭枝被綁架一幕。星爺因為要睇《伙頭智多星》大結局錯過逃走機會,重累甩頭枝被打爆頭。金水有少少後悔,口快快同甩頭枝講﹕「如果冇人要你,我要你!」令流血不止嘅甩頭枝冧番晒:「你放心啦!我冇人要㗎!」背景隨即傳嚟行雷閃電嘅聲音!睇呢一幕小心笑到斷氣呀!

《他來自江湖》劇情簡介﹕

講萬梓良飾演嘅黑社會大佬明天因做非法嘢害死未婚妻,令佢心灰意懶退隠江湖,以經營聯誼會為生。機緣下認識恬妞同毛舜筠發展三角戀。而星爺飾演嘅鑫淼係明天表弟,大食懶一名,劇情發展到尾段,因萬子嘅關係令鑫淼捲入毒品糾紛。結局當然邪不能勝正呀,黃秋生飾演嘅大奸狗文忠信Johnson,最後被槍擊倒地,至於萬子嘅3角戀係點?自己睇啦~~~~

當年嘅萬子有意裁培星爺,所以睇《他》劇你會發覺萬子有意淡化自己「狂燥」派嘅演技,而星爺嘅無厘頭派搞笑技法,就喺《蓋世豪俠》成形,再喺《他》劇確立。

There are 2 comments

Add yours
  1. 新Monday / 《男親女愛》之後最想睇? 10大伴你成長晚晚追神劇 - 新Monday

    […] 自大台播《大時代》勁好收視,就食髓知味連續播放多套神劇﹕《他來自江湖》、《誓不低頭》、《大鬧廣昌隆》,直到現在播映中的《男親女愛》,收視人氣持續高企,好多網民都在討論區開群組討論何時會播他們心中最愛「神劇」。其實你對現在的大台觀感是正還是負,但都不能否認它出品過很多伴你成長的神級作品,我們編輯部就嚴選了10套「我們當都會晚晚追神劇」推介給大家,那一套翻播你會晚晚通宵追呢? […]


Comments are closed.