專訪林書豪:籃球最令人瘋狂嘅就係你永遠唔會知將來發生咩事!

運動裝備

廣告

林書豪,1個籃壇嘅傳奇故事,1個代表住全球籃球迷夢想嘅寄望,1個令字典上添上「Linsanity」嘅人物,幾十年後佢依然會係家喻戶曉嘅故事,依然係人所共知嘅「林瘋」,但令人津津樂道嘅,好似永遠只得紐約人時期嘅「Linsanity」現象,難道林書豪已經冇辦法重返高峰?適逢佢嚟到香港,索性直接會一會佢。

text – Lok(ig:loklokb1021) photo – Tung、Rover

籃球最令人瘋狂嘅就係你永遠唔會知將來發生咩事
當年於紐約人打出「Linsanity」傳奇,可惜打法同「甜瓜」安東尼唔夾,之後轉戰火箭同湖人遇上同樣要key波嘅哈登同高比,一樣係冇得發揮,教練不停試陣亦唔識配合林書豪打法,結果令佢就被投閒置散,不過大家都知佢係一個唔會放棄嘅人,到底佢點樣準備下季重新出發?
N:《新Monday》 L:林書豪

 

N:你覺得過去一年喺湖人表現如何?
L:「整體嚟講表現麻麻,不過我覺得我每個月都有進步,每個月嘅表現都更好。全明星賽嗰段休息期之後更加達到最佳狀態。好開心自己依然能夠進步,喺唔同情況下都能夠搵到出路。」

 

N:點睇Steve Nash?同佢一齊訓練有冇學到啲咩?
L:「佢同我講一定要注意自己移動時嘅姿勢,其中一樣我學到嘅係先有啱嘅姿勢,先可以輕鬆咁擺脫對手。對我嚟講佢絕對係NBA最佳控球後衛之一,佢將佢所有天賦都喺籃球場上發揮到出嚟。」

 

N:你鍾意被睇好定係被低估?
L:「如果要我揀,我情願被低估。因為咁就可以俾人一個驚喜,而且對方喺防守你時都冇咁認真!哈哈!」

 

N:你嘅恩師Mike D’Antoni近日有可能重執教鞭,重話如果有機會嘅話希望你同佢再次合作,你又點睇?

L:「呢個明顯係一個唔錯嘅選擇。但宜家好難講,所有嘢都係未知之數。當然我好支持佢,佢對我嘅NBA生涯有注重大影響。」

 

N:湖人喺選秀大會上揀咗同你相同位置嘅D’Angelo Russell,你覺得你喺湖人重有冇發展機會?
L:「我都唔肯定,我知一定會影響到我,但呢個就係NBA,今天你重喺呢度,聽日可能就會唔見,佢都有可能會被交易換取DeMarcus Cousins,冇人知,我知道好多事情都一直會變。」

 

N:到底Kobe令你變成更好嘅球員,定係俾咗你更多壓力?
L:「其實佢冇俾我太多壓力,我已經打咗NBA五年,學識如何應付唔同程度嘅壓力。我都唔肯定佢有冇令我變得更好,但我的確喺佢身上學到好多嘢,例如佢如何對待球賽嘅態度。過去一季好艱難,因為佢好早就受傷,我哋真係冇咩時間一齊打波,冇時間產生化學作用,唔只我同佢,成個團隊都冇辦法一齊夾,但我覺得如果我哋有更多時間一齊打波,一定可以變得更好。」

 

N:咁下季你想留喺有Kobe嘅球隊,定係冇Kobe嘅球隊?
L:「要視乎情況,取決於邊個係控球後衛,有咩機會,球隊咩情況,教練係邊個等等,呢條問題好難答,太多因素要考慮。」

 

N:如果你繼續留喺西岸,你會點去同Stephen Curry等一流球員競爭呢?
L:「取決於我會喺邊一隊,老實講,籃球最令人瘋狂嘅就係你永遠唔會知將來發生咩事。一年前又有邊個估到勇士會贏冠軍?呢個就係籃球最精彩嘅地方。我覺得令人瘋狂嘅事經常都會出現於運動界入面,特別係籃球界。我真係冇擔心要對上任何一個特別嘅對手,我比較關心嘅係我將會加盟一支點嘅球隊,對我嚟講所有嘢都船到橋頭自然直。」

adidas Sports Base 香港運動基地
林書豪嚟得,當然係因為香港有勁嘢發生,今個夏季,adidas喺中環海濱活動空間興建adidas運動基地(adidas Sports Base),為熱愛運動嘅年青人打造以「Boost Your Summer」為題嘅大型暑期企劃,大家準備好汗灑中環!
於為期約6個星期內,adidas Sports Base內將會舉行一連串嘅運動比賽同訓練,包括《adidas Cup 2015》、《2V2 be the difference 2015》足球賽事、《adidas Streetball Challenge 2015》、《adidas Streetball Academy 2015》籃球賽事及訓練、以及跑步、瑜伽《#mygirls Yoga Class 》等等,為對運動充滿熱情嘅年青人提供綜合運動體驗,希望透過一連串活動提供比賽同訓練平台,發揮潛能,互相激勵,負起推動本地運動發展嘅責任,呢點要讚。

「Linsanity」 Hong Kong Version
其實林書豪剛剛結束喺內地adidas 「Take On Summer」成都之旅就立即到港,現身中環出席adidas Sports Base的開幕禮,短短停留兩日,不過已經足夠引起香港「Linsanity」,大量fans於機場、酒店、中環守候,都係想見偶像一面,而林書豪都親民咁同大家大玩自拍,希望下次佢可以有更多時間留港,同祝福佢下季有好表現啦!