【變靚啲】減肥瘦身、彩妝、編髮乜都有，務必follow嘅4位IG 扮靚達人 ！

即刻follow呢4位 扮靚達人

1. jenselter
2015年係蘋果臀、蜜大腿嘅時代，如果你都想操出S形身材，絕對唔可以唔識Jen Selter喇！美國紐約電臀女王Jen Selter今年只有21歲，但就憑1對完美翹臀成為網絡紅人，IG粉絲直迫700萬人，勁過唔少明星！佢熱愛健身，佢就係靠做gym練成結實、火辣嘅好身材，佢唔止成日喺IG大晒靚臀「呃like」，亦好大方咁公開佢嘅keep fit秘技，拍片教大家操出蘋果臀，佢更加表示分享靚相唔係想曬命，而係想鼓勵大家保持健康，多啲做運動！高中畢業嘅佢身價翻咗幾倍，由喺健身中心返part-time，「升呢」成為幾個運動品牌嘅代言人，重賣埋健身衫，呢個故事夠晒勵志喇卦？

2. nyan22u22nyan
有睇日雜或者留意開日本潮流嘅人，都會羨慕㗎妹啲髮型點解可以咁靚，而家唔使再恨喇！工藤由布小姐（ Yu Kudoh）係日本東京嘅人氣hair stylist，佢平時好鍾意share編髮技巧，佢IG入面差唔多清一色都係髮型分享/教學，除咗影相之外，佢亦都會拍片示範添，而且簡單易明，唔識日文又點喎！咪話我唔益你，去開東京嘅朋友都不妨去Hair Desigh N.Mist（〒150-0011 東京都渋谷区東3-14-22ルヴェール渋谷東）搵佢set頭喎，包你靚住去旅行吖，不過記住book咗先喎（03-3499-2386），因為佢都好受歡迎，隨時full booking㗎！

內容延讀：

＞再Follow呢9種韓風 狗狗髮型 ，扮靚實掂！

＞識扮靚﹗就要識畫玩轉 腦朋友阿愁 阿樂 指甲

3. cocoring_beauty
韓國當紅beauty blogger코코링（cocoring）係暖色系女生，個樣夠sweet夠可愛，好討好，佢除咗會喺佢個blog （http://ooaooahello.blog.me/）分享美容扮靚心得之外，亦都定期update IG，不過唔識韓文嘅人淨係follow佢IG已經夠晒。코코링嘅膚色偏暖、面形偏圓，無論係膚色抑或面形都同香港女仔比較接近，而佢嘅妝容主要行清新自然風，香港女仔跟得過之餘，IG入面重有好多眼影、胭脂同唇膏等等嘅試色相，shopping之前不妨參考下喎！

4. hakonyang
韓國除咗有彩妝女王Pony朴惠敏之外，重有個人氣化妝師你一定要識，佢就係《韓國超人氣No.1彩妝術韓系咬唇妝》嘅作者朴美和喇！佢擅長用簡單嘅技巧，教讀者根據唔同場合、季節等等，化出最hit嘅妝容，韓式光感妝、百變唇妝通通難佢唔到。佢算係比較全能嘅美妝達人，除咗係化妝師之外，亦都係美甲師、beauty blogger兼YouTuber，鍾意分享畫甲花樣、明星仿妝同埋穿搭照。

想仿少時隊長泰妍喺新歌〈Party〉入面個look？即睇！

內容延讀：

＞再Follow呢9種韓風 狗狗髮型 ，扮靚實掂！

＞識扮靚﹗就要識畫玩轉 腦朋友阿愁 阿樂 指甲