上海啟動NIKE RISE打出名堂 籃球追夢吧!

運動

廣告

還記得上年夏天流過的汗水嗎?

2014夏天,NIKE首次舉行「RISE打出名堂」籃球活動,喺中、港、台三地集合一班技術未必係最好,但一定係最熱愛籃球嘅人,俾佢哋1個世界級舞台,接受嚴格訓練去實現自己嘅籃球夢,每個人背後都有一段故事。我記得上年睇佢哋嘅片,有好幾次都睇到打冷震,見到嚟自兩岸三地嘅參賽者,喺訓練營中嘅付出,每滴汗都代表對籃球嘅熱愛、付出⋯⋯睇到勁熱血,打籃球唔一定要做最好,只要全力付出,就可以打出名堂。
1年過去,2015「RISE打出名堂」日前已經喺上海啟動,上年3位MVP同巫師球員Bradley Beal都分享自己嘅籃球追夢故事。

今年你準備「打出名堂」未?

text-譚大偉(ig:taiwaitam) photo & video – 新、Yan

https://www.youtube.com/watch?v=pPYd1DyELMk

踏上這無盡旅途
NIKE上年首次舉行「RISE打出名堂」活動,希望可以提供1個世界級舞台俾大中華地區所有熱愛籃球嘅青少年,鼓勵佢哋無論出身如何、技術高低,只要敢想敢做,對籃球有激情與渴望,就可以去發揮對籃球嘅熱愛,實現對籃球嘅夢想。
參加者除咗接受嚴格嘅籃球訓練外,重有機會同NBA 1線球星打波,記得舊年上海站,MVP之一嘅李觀洋同Kobe 1-on-1連續得分嗰幕更係經典,可以向NBA頂級球星學習,呢啲經驗去邊度搵?講真,自己都想報名去實現自己嘅籃球夢。

夢想第1步
日前,NIKE喺上海大中華總部(後面會有介紹)啟動「RISE打出名堂」2015,上年3位MVP:吳松蔚(台灣)、 李觀洋(中國)、黃律堯(香港)當然都有出席活動,分享參加「打出名堂」後,籃球對人生嘅改變,除此之外,重搵嚟中國籃球著名教練王非同郭士強講中國青少年籃球發展。當然,點少得巫師球員Bradley Beal講出自己如何追夢,變成NBA球員嘅故事?
NIKE 2015「RISE打出名堂」即日起至6月26日接受報名,想參加可以通過nike.com/basketball上傳視頻或喺香港指定NIKE零售店報名。

https://www.youtube.com/watch?v=B4FRwwaDvrU

&feature=youtu.be

Bradley Beal:阿媽迫我打波
作為NBA 3年生,巫師正選得分後衛,今年更打入NBA playoffs第2圈,雖然最後被鷹隊淘汰出局,但球隊重好年輕,出年應該可以打出更好成績, Bradley Beal都話:「我希望下季至少要打到東岸決賽。」
香港怪獸家長當道,小朋友入名校係自己開心多過小朋友,報讀興趣班都係學外語彈琴等,絕對唔會好似Bradley Beal阿媽咁,叫佢去打籃球。
「6歲嗰陣被媽媽強迫拉咗去打籃球,而我屋企有4個哥哥,佢哋就打美式足球,我可能生得唔夠大隻,所以就去打籃球,喺媽媽嘅訓練同鞭策底下,慢慢愛上呢項運動。媽媽除咗教我籃球技巧,重教咗我好多知識、道理同責任感等等,如果冇佢,我就唔會打入NBA。」

1993年出世,屬於90後嘅Bradley Beal,竟然話唔識Jordan?
「Jordan最全盛時期,我只係個5歲嘅小朋友,所以我真係對佢冇咩印象,而我最鍾意嘅NBA球員係前76人後衛艾華遜(Allen Iverson),我除咗會模仿佢嘅打法之外,我都好鍾意跟佢着衫,AI對我影響最深。」
最後想同年輕球員講:「打籃球一定要享受打籃球嘅時刻,要不斷練習,唔好放棄,捉緊機會,就可以打出名堂。」

黃律堯:5年目標
上年「RISE打出名堂」成功代表香港脫穎而出,成為最後3位MVP嘅黃律堯(堯帝),最大改變一定係被甲一球隊晉龍睇中,成為甲一籃球員。就連主持黑人都話:「我看到他成為真的籃球員,我內心也很激動。」
堯帝本人就有個更大嘅目標,佢話:「我希望可以繼續進步,可以成為香港隊代表。之後,希望衝出香港,去到中國嘅CBA或者台灣嘅SBL打職業,我希望5年內做到。」
而家每句說話都充滿「火」嘅堯帝,原來都曾經失落過。「曾經有段迷失時間,唔知自己下一步可以點,但參加『RISE打出名堂』喺訓練中不斷進步,教練亦教咗我好多嘢,慢慢令我喺籃球中搵番快樂。

「而家我媽咪都好支持我打籃球,慢慢我哋嘅關係都因為籃球而變得好。」

吳松蔚:重新出發
如果講到舊年最令我印象難忘嘅籃球故事,我相信一定係嚟自台灣嘅吳松蔚,因為爸媽離婚,加上媽媽離世,所以要放低最愛嘅籃球,返到老家照顧阿嫲,過住半工讀嘅日子。幸好去年屋企環境轉變,亦見到「RISE打出名堂」,於是抱住打不死精神參加,重走到最後,成為MVP。
「最難忘是我奶奶來看我打球,那是我最感動。因為我兩年前家裏有問題,所以我必須選擇籃球還是回去照顧奶奶。奶奶畢竟是我唯一的親人,所以我回去照顧她。籃球路沒有再行下去,所以去年參加『打出名堂』時,NIKE安排奶奶來現場看我打球,看見奶奶的時候,她是淚流滿面。」除咗重新接觸籃球,佢人生觀亦開始轉變。「回到台灣,責任心也更強了,更懂得怎樣去教導別人、教導學弟。」

李觀洋:自信令我不放棄
最後1位MVP係嚟自中國李觀洋,其實佢打籃球一直都被屋企人反對,直到去年「RISE打出名堂」,父親先對個仔改觀,由反對變成支持,簡單1個支持短訊,已經得到好多。
「最難忘在上海和Kobe 1-on-1,我不知在哪裏來的勇氣,竟然主動舉手挑戰,而且重先得分,雖然最後輸了,但到現在感覺很不可思議。那次之後,我收到爸爸1個短訊,寫上『兒子,你是最棒的!』我沒有回應,因為我已經哭了!父母一直很不支持我打球,突然收到這句說話,所以很激動。
「比賽過後,我覺得自己更有自信,球場上的自信令我在生活中也變得自信。我現在已經變得更不想放棄,經過『RISE打出名堂』,讓我更懂得珍惜。」

霸氣場館