【瞓極都咁攰?】教你4招 祛濕 食完精神晒!

造型打扮

廣告

雖然話夏日炎炎正好眠,但相信呢排好多人都同小編一樣,瞓完好似冇瞓過咁,一起身就頭重重,成身冇力,似感冒非感冒。種種徵狀顯示要 祛濕 ,你好可能係中醫所講嘅「濕」。夏天本身已經潮濕,重成日涼冷氣同飲凍嘢,真係唔「濕」就奇。不過中醫學嘅嘢,小編識條……咩!所以就特登請教咗美容養生達人Winnie Z,講解吓咩叫做「濕」,順便同大家介紹4款 祛濕 ,埋嚟學嘢喇喂!

text-Emily (ig:emkiuuuuuuuu

揀啱祛濕食療濕氣即走

拆解「濕」之謎

1. 點為之濕?點樣先知自己要祛濕?

主要徵狀是係易攰、頭重身重、四肢冇力,瞓醒好似冇瞓過咁。另外,脷苔厚,好似有層白色嘢喺脷上面咁,都代表濕重。對女仔嚟講,濕重容易引致水腫,試吓用手指大力按小腿一下,如果啲指印好耐都唔散,你肯定好濕喇!

2. 如果唔想「濕氣」積聚,應該戒食啲咩?

盡量少啲食同飲凍嘢。夏天嘅脾胃功能比較弱,所要少食吃肥膩、難消化嘅食物,如果唔係就會阻礙脾胃運行,愈嚟愈濕。

3. 喺中醫角度,咩食物有祛濕嘅功效?

最常用嘅袪濕食品有土伏苓、紅豆、赤小豆同薏米等等。(唔怪得阿媽近排成日買呢啲料煲湯啦!)

 

即學4款袪濕食療
1.老黃瓜赤小豆扁豆煲瘦肉湯

老黃瓜湯消暑又祛濕,最啱落雨天、潮濕天氣飲。
材料:老黃瓜1個、赤小豆1兩、扁豆1兩、瘦肉250g、蜜棗1-2粒

做法:先將瘦肉飛水,老黃瓜、赤小豆、扁豆洗乾淨,用水浸半粒鐘,再將老黃瓜切件,然後將所有材料放入煲,煲兩個鐘。鍾意陳皮味嘅人,可以加多一片陳皮吊吓味。

內容延讀:

話知你信唔信,韓星都靠呢6大偏方減肥 !

M痛痛到命都冇?入嚟睇吓嗰幾日要食咩飲咩!

2. 土茯苓煲草龜湯

呢款湯水祛濕之餘,重可以解毒,功效重勁過你食幾碗龜苓膏。

材料:草龜1隻、新鮮土茯苓400g、瘦肉200g、紅棗3粒(去核)

做法:將草龜洗乾淨,然後斬件,同瘦肉一齊飛水後撈起,土茯苓同紅棗就用清水洗。之後將所有材料放入煲,煲3個鐘就搞掂。

 

3.赤小豆薏米水

做法方便又快捷,冇時間煲湯嘅人飲就最啱。薏米水祛濕之餘,重有美白功效,絕對係女人嘅恩物。

材料:赤小豆、薏米

做法:攞少量赤小豆同薏米,洗乾淨,再放入煲之後加水。煲滾就飲得,返工人士重可以倒入保暖壺到,拎返office慢慢嘆。

 

4.小編推介祛濕甜品:香蕉奇異果乳酪

我知,我知中醫實叫你唔好食凍嘢,但夏天熱成咁,你真係可以完全忍到口?死忍好辛苦嘅,揀啲有益嘅嚟食咪得囉!小編就最鐘意DIY香蕉奇異果乳酪,香蕉同奇異果有豐富鉀質,利尿兼去水,加埋乳酪,大便都腸通啲,咩毒都清晒!

材料:香蕉1隻、奇異果1個、低脂原味乳酪1杯

做法:將香蕉和奇異果切粒,倒入乳酪到,撈埋一齊食就搞掂,so easy!

即睇﹗香蕉奇異果乳酪整法

https://www.youtube.com/watch?v=9990qMKwXtE

There are 9 comments

Add yours

Comments are closed.