墳總青永屍 串爆蔡東豪

流行娛樂

廣告

「啋!攞死人開玩笑咁冇人性嘅?」

的確,對於中國人嚟講,「搵死人嚟講笑」係大不敬,不過facebook專頁「墳場新聞」就偏偏靠「死人」爆紅。

網友稱佢為「墳總」嘅專頁負責人「青永屍」,原本起壇只係諗住嘲諷另一專頁「立場新聞」,點知開台後follow人數超過6萬,受歡迎程度重勁過「本尊」立場新聞!

多人睇,全因墳總以「死人」(多數係歷史上嘅名人)把口諷刺香港時弊,寫得抵死啜核而諷刺意味濃。佢而家重積極拓展地盤,最近同當紅YouTuber學舌鳥合作,整咗個「墳場動新聞」,唔通要同肥佬黎睇齊?

text-Oscar photo-網上圖片

讀歷史睇人性

墳總好神秘,只肯接受電話訪問,更唔透露任何個人資料,只肯講佢係香港某大學文化及語言學系碩士,而家喺某band 3中學做老師。「墳場新聞」內嘅文章都係佢一手包辦,每日最少寫3篇文章,除咗「搵」啲已過咗世嘅名人做「訪問」外,又會寫下評論同好書推介。

佢嘅文章借古諷今,尤愛以古人同一啲歷史事件諷刺而家嘅特區政府。好似佢會以唐太宗玄武門之變,去諷刺港高官要港人「袋住先」嘅政改方案極荒謬。墳總用典故恰到好處,文章生動抵死,只因佢好鍾意讀歷史,佢話:「未至於迷戀嘅,但真係好鍾意睇中史同文學。從中我睇到人類不斷鬥爭,好多悲劇不斷重複發生,但當中又可以睇到,其實人類重有『真、善、美』嘅一面。講開人性,我覺得香港某君之前以誤判時局為名博同情,過咗風頭火勢又重開『立場』攞彩就唔係幾啱囉!」

 

「蔡東豪文筆好差」

墳總講嘅說話幾乎句句都「有骨」,尤其提起「立場新聞」,佢會特別勞氣。先講「立場新聞」背景:佢前身係「主場新聞」,創辦人蔡東豪喺舊年7月26日以「誤判社會及市場形勢」同「感到恐懼及壓力」將「主場新聞」結束,5個月之後另辦「立場新聞」,馬上遭到各界狠批,尤其喺網絡世界,話佢哋喺雨傘運動後再搞新聞網站,有「賊過興兵」嘅感覺,於是多名網民自發開設多個「乜場新聞」去諷刺「立場新聞」,而「墳場新聞」就係咁出現。

「你問我點睇蔡東豪?咪用眼睇囉!我會『放長雙眼』睇佢!要我認真答,我會對佢根本不屑一顧,佢啲文筆好差,加上人生時間好短,無謂嘥時間睇垃圾文章啦!」

小息寫墳場文

墳總話最初因朋友開咗個「賭場新聞」,令佢都想「玩」埋一份而開設「墳場新聞」,開咗2個星期,follow人數已經超過「立場新聞」。截稿前「墳場」liked人數超過6萬人,遠遠拋離「立場」約7千人,重吸引到創作《獨自去鳩嗚》嘅網上創作團隊學舌鳥,搵佢合作拍咗套《墳場動新聞》。有人曾經話佢「唔尊重死人」,但墳總話:「我都冇被死人鬧過,咁即係話佢哋冇投訴啦!」

墳總話雖然經營「墳場」樂趣好多,但佢嘅老師正職,又要開會又要改卷已經忙到抽筋,所以「墳場」嘅文好多時都係喺小息嗰15分鐘寫,一寫就約700字。「我本人唔睇新聞嘅!『墳場』嘅文我都係睇到網友分享嘅文章,腦海就有歷史故事彈出嚟。」

好想執咗墳場新聞

雖然講嘢好mean,但記者肯定作為老師嘅墳總,係個熱血教師,只因佢講起香港教育制度就滔滔不絕,重話對學生應該因材施教。「佢冇心機讀書,再迫成績都唔會好,我會教呢啲學生『一技傍身,可以養活到自己』就算。如果學生鍾意讀書,就要教佢讀書嘅方法。而家嘅教改話要做『生涯規劃』,但事實上人生無常,點規劃呀?我覺得做人就要好似殷海光嘅《人生的意義》咁,做個頂天立地嘅好人,無愧於心,亦要裝備好自己,把握每個機會。」

去年9月底,學生包圍政總,墳總有去現場支援,因為當時佢嘅學生都有被捕。其後嘅雨傘運動,佢到過旺角同啲阿伯鬧交。無論係大吵大罵,抑或網上筆戰,佢嘅宗旨都係「唔會教精佢哋」,因為:「我收咗人工去教學生,但佢哋都冇交學費,做咩要教精佢哋?」墳總話「墳場新聞」應該有排玩,但佢更希望快啲執咗佢,佢話:「正所謂『一法起,一弊生』,政制無分好壞,只有善與惡,不過人民眼睛係雪亮,雖然難分『善』,但好易就分得出『惡』,而家一睇就知係『惡』法啦!我好希望有日『墳場』執笠,因為呢個世界唔再需要用文字去『串』呢個政府。」

「__場新聞」 雨後春筍

「立場新聞」整合咗諷刺該網站嘅組圖,除咗反映香港人有創意,各方都好執着自己嘅觀點,或者呢個就係香港現況嘅冰山一角。

網民聲討「立場新聞」嘅聲音此起彼落,而喺該新聞網站見街無耐,就可以喺facebook搵到超過70個「__場新聞」出現,當中包括今期「Wero」主角「墳場新聞」,重中有「失場」、「騎牆」、「垃場」等等,明踩「立場新聞」,另外亦有「劇場」、「膶腸」、「機場」等玩食字。不過,好多「__場新聞」已經冇再更新,而當中只有「墳場新聞」搞得最有聲有色。

 

墳總教讀書

墳總讀書咁叻,梗要問佢秘訣,佢就話睇書唔會一口氣睇晒1本書,而係同時睇幾本書,因為好多書都好似《紅樓夢》咁,分開唔同時段寫成,所以讀者亦唔需要一口氣讀晒。以下4本書佢強烈推介俾有心增進中史同文學知識嘅人睇,睇完之後話唔定你都可以好似墳總咁,借古人諷今。

*以下書本喺各大書局有售。

 

1/ 《戰國策》 作者:佚名

墳總解讀:「《戰國策》主要講縱橫之術,現代語言即係『抽水』同『騎劫』,不過魏晉時代,有啲謀士只睇《戰國策》,乜都唔識只識得『抽水』、『騎劫』,結果咪亡國。另外,呢本書都啱成日用錯成語嘅人睇,因為有好多成語出自《戰國策》。」

 

2/ 《辭源》 作者:陸爾奎

墳總解讀:「最早期嘅漢語字典,由於佢係用古文嚟解釋,覺得好好玩,而且能夠睇晒成本《辭源》嘅人,寫文一定唔會寫得差!」

 

3/ 《狼八式》 作者:鍾偉文

墳總解讀:「香港人共通性格都係刻毒、涼薄,呢本書就係以刻毒、涼薄嘅風格,批評香港作家之餘,又會教大家寫作技巧。」

 

4/ 《語理分析的思考方法》 作者:李天命

墳總解讀:「而家好多人都會顛倒是非黑白,李天命教大家分辨真話同假話,等大家唔好咁易就墮入語言偽術嘅陷阱中。」